Home / Lajme /  KUSH PO I VRET SHQIPTARËT ?!
Aktiv

 KUSH PO I VRET SHQIPTARËT ?!

May be an image of 1 person

Shkruan: Isa Feriza

Tiranë, më 08.06.2021
Tri dekada që Shqipëria dhe shqiptarët ndodhen e po jetojnë në kushtet e një rendi ekonomiko-shoqëror që njihet me emrin “kapitalizëm”.

I zhveshur krejt në mënyrë absurde emertimi i këtij sistemi si ‘kapitalist’ dhe, zëvendësimi i thelbit të përmbajtjes së rendit shoqëror, ekonomik e politik, të kësaj kohe tridekadëshe me
emërtimin ‘demokraci’, ‘koha e demokracisë’, emërtime këto krejt mashtruese, është më shumë se sa një krim, pasi luhet kriminalisht me popullsinë, me nivelet e intelekteve të saj.

Kjo formë emërtimi e këtij rendi shoqëror e ekonomik nuk e ka të pasqyruar qëllimisht, dihet me orientim  nga politika, përcaktorin “kapitaliste”, (demokracia borgjeze/kapitaliste) përcaktor ky që i jep thelbin e përmbajtjes së kësaj mënyre të organizimit shoqëror në këtë rend.

Nuk është për t’u habitur nëse, që nga fillimvitet nëntëdhjeta e deri më sot, figura e krimit të vrasjes në procedurën penale të drejtësisë në vendin tonë, si: vrasjet, vetëvrasjet, gjakmarrja, hakmarrja, krimi me vrasje brenda në familje, vrasja e femrës, etj. si këto që lidhen me vrasjet, janë figura më e njohur kriminale, por edhe njollat më të shëmtuara në ballin e këtij sistemi
pjellës të kësaj plage e, pa të cilën s’mund të konceptohet ky rend më tepër se sa çnjerëzor.

Vrasjet e njerëzve nga njerëzit, si një nga dukuritë më të shëmtuara e më të dënueshme për një shoqëri njerëzore, janë tregues që ulërasin për origjinën nga burojnë e vijimësinë e rrugës së tyre, të cilat papritur e kaplojnë edhe tërë një shoqëri.

Mbajtja e shoqërisë, me qëllim të vetëdijshëm nga superstruktura e saj, në një nivel të ulët kulturor e arsimor, por edhe ekonomik e jetësor; mbjellja, po me qëllim të caktuar nga kupola politike e asaj shoqërie të shkëputur gjithanshëm nga shoqëria e zakonshme e njerëzve të zakonshëm e të thjeshtë e kriminalitetit të gjithëformshëm; krijimi e thellimi i diferencimeve shoqërore të gjithfarshme në shoqëri; gllabërimi e grabitja e papërceptueshme nga logjika normale njerëzore, e pasurive kombëtare dhe, shfrytëzimi çnjerëzor i njeriut – popull, nga njeriu – pushtetar, shtetar, afarist, kriminel, etj., në të gjitha mënyrat nga më të paimagjinueshmet; ushqimi e bombardimi i shoqërisë vetëm me politikën e forcës politike në pushtet, që në fund të ditës rezulton një gënjeshtër në vargmalet e gënjeshtrave që prodhon politika e sistemit aktual borgjezo – kapitalist; kthimin e një shoqërie të tërë në një shoqëri shkllevërish, në një masë apo ‘turmë,-kope’ shërbëtore të “elitës” skllavëruese, shtypëse e shfrytëzuese, krejt e, hapur edhe çnjerëzore, janë veprime, qëllime e mjete më tej kuptimshmërisë së fjalës “kriminale”!

Nuk jam i prirur që të mohoj gjithçka që ka arritur shoqëria njerëzore edhe në këtë hark kohor të këtij sistemi kapitalist, pasi vetë zhvillimi natyror i shoqërisë ka sjellur mjaft progrese të gjithanshme, çka përbëjnë edhe një nga traditat e çmuara të njerëzimit, si trashëgimi njerëzore, pavarësisht vendit, rracës, ngjyrës, fesë e rendit shoqëror, nga e cila duhet të mësojnë e të marrin të gjithë popujt e këtij globi njerëzor.

Le të ndalem tek dukuria që përmenda në fillimin e këtyre radhëve, “vrasjet” për fat të keq, për këtë dukuri më duhet të shkruaj për ekzistencën dhe dominimin e kësaj figure krimi në shoqërinë shqiptare në Shqipërinë e sotme kapitaliste.

Si kurrë më parë, as në kohërat më të errëta të shqiptarëve, krimi ndaj femrës nuk ka qenë më i egër e, më i lartë. (!)

Ja, po sjell disa të dhëna të frikshme në lidhje me këtë figurë krimi e, veprimi më se kriminal, marrë nga burime të ndryshme vendëse dhe të huaja:

Krimi ndaj femrës, sot ka marrë përmasa tronditëse, aq sa për këtë shkak vendi ynë, nga studimet e institucioneve ndërkombëtare, për këtë qëllim, rënditet në vendet me nivelet më të larta të këtij krimi.

*“Shqipëria me vrasjet më të larta, nga partnerët intimë në Evropë”.
*(14 gusht 2019 – Eurostat)
“Ndërkohë sipas një raporti të UNODC, Shqipëria është vendi me nivelin më të lartë të vrasjeve nga partnerët intimë në Evropë”.
-E dhëna, është publikuar nga *[Zyra e Kombeve të Bashkuara për Krimet dhe Drogën ( UNODC)] në një raport të fundit të saj, “Studimi global për vrasjet e lidhura me gjininë për gratë dhe vajzat”.

Në Shqipërinë socialiste femra shqiptare ishte e pacenueshme, e mbrojtur me ligj dhe me forcë shteti dhe partie. Më 06 shkurt, 1967, Enver Hoxha deklaronte: “Gjithë Partia dhe vendi duhet të ngrihet në këmbë, të djegin me zjarr zakonet prapanike e t’i këputet koka cilitdo që merr nëpër këmbë ligjin e shenjtë të Partisë, për mbrojtjen e të drejtave të grave dhe vajzave”!

Ja, ky ishte shteti i demokracisë Popullore, shteti i diktaturës së proletariatit; shteti i rendit socialist.

Në Shqipëri ndodhin tri herë më shumë vetëvrasje se vrasje  *(sipas të dhënave që janë publikuar nga INSTAT, 29 maj 2018, 12:32)

Në vitin 2017 në Shqipëri u kryen 199 vetëvrasje, sipas të dhënave që janë publikuar nga INSTAT, me një rënie prej 11.5%  (26 persona më pak) në krahasim me vitin e mëparshëm, shkruan ‘Monitor’.

Pra në vitin 2016  paskëshin qenë  afërsisht 222 vetëvrasje. (!)

Nga hapja e thyerja e depove të armatimit në Shqipëri, në vitin 1997, u grabitën 350 000 armë, sipas shtetit, çka po të hamendësonim në mënyrë hipopotike, sikur çdo një armë e rrëmbyer të vriste veten një njeri, do të kishim 350 000 të vrarë. (!!!) Atëherë kur shumica e atyre armëve kanë vrarë më shumë se një njeri, a qëndron shifra zyrtare për rreth 6000 shqiptarë të vrarë në vitin 1997?

Figura e vrasjes është e njëjtë edhe me atë të “vrasjes” nga veprimi e mosveprimi i shtetit me strukturat e veta, çka shkakton vdekje individësh, por edhe vrasje masive në shoqëri.

Sipas logjikës së shëndoshë del se:

Në vitin 1994, si rezultat i mosfunksionimit dhe i mosvleresimit të situatës nga ana e shtetit, do t’iu vihej flaka e zjarri magazinave në qytezën e përpunimit të drurit, por edhe të bakrit, Fushë – Arrësit, në rrethin e Pukës, ku do të digjeshin të gjallë 44 njerëz. (!) A nuk është një lloj vrasjeje e drejt për drejtë e njerëzve në mënyrë masive, nga papërgjegjshmëria e shtetit, pasqyrë e këtij rendi ekonimiko – politiko – shoqëror, me emrin ‘kapitalizëm’? Kujt i hyri ferra në këmbë për këtë vrasje shtetërore masive? Dihet se vrasësi kur është shtet e pushtet, nuk e gjykon e, as e dënon veten.

– Shpërthimi në supermarketin e parë shqiptar në pronësi të kompanisë “VEFA Holding” më 26 shkurt 1996, në Tiranë, me 4 të vrarë e, 27 të plagosur.

– Hapja e depove dhe e magazinave të armatimit ( mbi 6000 te vrare….) sipas variantit zyrtar, por kjo shifër mund të jetë, dhe në fakt është, disa herë më e lartë.

– Tragjedia e 1997 në tunelin e Qafë Shtamës, ku 23 veta vdiqen (29 prill të vitit 1997).

– Me 28 mars 1997, mbytet në det, në Kanalin e Otrantos, anija shqiptare “Katëri i Radës”, me 142 njerëz në bord, e goditur qëllimisht nga anja italiane “Sibila”, ku humbën jetën 81 persona, me moshë nga 3 vjeç, deri në 69 vjeç dhe 24 të mbytyr të zhdukur, të pagjetur kurrë më…( Pra, ata të mbyturit dhe të zhdukurit në atë ndodhi tragjike, ishin gjithsej 105 njerëz të pafajshëm e të pambrojtur shqiptarë).

– Tragjedia e shpërthimit në Gërdec, më 15 mars 2008, ku humbën jetën 26 përsona.

– Tragjedia e 9 janarit 2004, në ngushticën e Kanalit të Otrantos e, ku mbyten në det duke humbur jetën 28 përsona.

– Vrasja  e katër efektivëve të FNSH-së, Fatos Xhani, Altin Dizdari, Kastriot Feskaj, dhe Sajmir Duçkollari, gjatë një operacioni për arrestimin e Dritan Dajtit, në Durrës, në gusht 2009…

– Vrasja e katër demonstruesve më 21 Janar 2011, nga plumbat e shtetit, në demonstratën e thirrur nga PS. Në këtë demonstratë u vranë demonstruesit: Ziver Veizi, Hekuran Deda, Faik Myrtaj dhe pak ditë më vonë vdes në spital, nga plagë që pati marrë në atë demonstratë (ishte
qëlluar me një plumb në kokë), edhe demonstruesi i katërt, Aleks Nika.

Përseri, “vrasje” quhen edhe vdekjet në aksidentet automobilistike rrugore, si pasojë e mosfunksionimit normal të shtetit. Një shtet indiferent ndaj jetës njerëzore, të shtetasve të tij, kthehet në një vrasës jete serial e profesionist.

“Çdo vit vdesin nga aksidentet në rrugë 354 – 360 njerëz e trefishi i kësaj shifre janë të plagosurit, (1700 njerëz)” ! *(Emisioni “Xhungël” i Tv. “News 24”, datë 22.05.2012).

Shqipëria borgjeze, është vendi ku “në njëzet vjet janë vrarë 208 policë”. (!)
Kjo shifër, në 30 vjet ka shkuar tek shifra 500.

Të dhënat e institucioneve që merren me dukurinë e gjakmarrjes, për 27 vjet të kësaj “demokracisë borgjeze” në Shqipëri, publikojnë shifra trishtuese, në lidhje me këtë plagë. Sipas tyre, ka më se 900 fëmijë të ngujuar; ka 1600 familje të ngujuara; ka 2800 fshatra me problem hasmërie, në 300 komuna e në 60 bashki. Po puna, pra, edhe buka, për këta njerëz në ngujim e, mësimi për fëmijët e tyre të ngujuar edhe ata, ku janë? Ju e dini…! Pra edhe ato janë në ngujim! Me një fjalë: “Janë vrarë, bashkë më ëndrrat e shpresat e tyre”!

VRASJET QË KANË NDODHUR NË 27 VJET NË SHQIPËRI  (15/12/2017 – 08:07)

Viti :  1990  –  129   të vrarë

1991  – 205
1992  –  251
1993  –  268
1994  –  265
1995  – 210
1006  –  248
1997  – 1542
1998  –  573
1999  –  496
2000 –  275 të vrarë
2001  –   208
2002  –   179
2003  –   144
2004  –   119
2005  –   131
2006  –     87
2007  –   103
2008  –     88
2009  –     82
2010  –   118 të vrarë
2011  –   124
2012  –   126
2013  –   107
2014  –     98
2015  –     54
2016  –     71
2017  –     47
2018  –     68(Instat)
2019  –     63(Instat)

*Marrë nga interneti – www.ora news. Tv. article. raport – 1990 – 2017- vit – pas-viti”.

*  Për 30 vjet, 1990 -2019, na del se në Shqipëri janë vrarë 6479 njerëz, ose 216 njerëz në vit. Edhe po të kishte qenë situatë lufte, kjo shifër do të kishte qenë shumë e lartë.

Nga një burim tjetër, po për dukurinë e vrasjeve në Shqipërinë e demokracisë borgjeze kemi këto balance, të cilat ngjajnë si dy pika uji me bilancet në rrethana luftarake:

* Gazeta  “TemA” (onlain)  – 10 janar 2014 :

Viti :   1990  –   205  të vrarë
1991  –   205
1992  –   251
1993  –   268
1994  –   265
1995  –   210
1006  –   248
1997  – 1542
1998  –   573
1999  –   496
2000 –  275 të vrarë
2001  –   208
2002  –   179
2003  –   144
2004  –   119
2005  –    131
2006  –      87
2007  –    103
2008  –      88
2009  –      82
2010  – 118 të vrarë
2011  –    124
2012  –    125
2013  –    120
* Për 24 vjet, në Shqipëri, janë vrarë 6144 njerëz, ose 256 njerëz në vit. (!!)

*Në 5 muaj – janar – maj 2021 kanë ndodhur  27 vrasje.* (TV Klan – “OPINION” – dt.07.06.2021).

Gazetari, Marin Mema në emisionin “Gjurmë shqiptare” në “Top channel. tv.”, me datën 27 mars 2021, në orën 21, thotë se që nga viti 1992 e deri në vitin 2000 u vranë në tokën greke 80 shqiptarë nga policia e ushtria greke.Nga viti 1992 e deri në vitin 2020 janë vrarë mbi 100 shqiptarë në tokën greke nga policia e ushtria greke e, shteti shqiptarë është mjaftuar me ndonjë deklaratë të rrallë e të thatë.

A nuk janë vrasje edhe vdekjet e njerëzve shqiptarë në këto vite të mbrapshta borgjeze, nga aksidentet automobilistike rrugore? Po! Ja disa të dhëna të tjera që flasin qartë për natyrën kriminale të këtij rendi ekonomiko – shoqëror me emrin “kapitalizëm”, nga ky lloj krimi vrasës, krim që rrjedh nga mosvlerësimi i jetës së njeriut nga shteti dhe rendi shoqëror i sotëm borgjez, në vendin tonë:

– Vdekjet në aksidentet rrugore – *(Gazeta “SOT” 10.05.2013) :  “Shqipëria pa siguri rrugore, në 20 vjet ka mbi 18 mijë aksidente me  9710  viktima dhe 26 mijë të plagosur.

– Në 11 vite në Shqipëri (2010 – 2020) nga aksidentet automobilistike në rrugë, kanë humbur jetën: 3146 + 181= 3327  njerëz, ose afërsisht 302 njerëz në çdo vit. *(TVSH- Lajmet e orës 13.00, më 20.01.2020  +.   {* INSTAT – Aksidentet rrugore mujore – shet. 1; (Nga viti 2010 – 2020 për çdo muaj)}.

Aksidentet rrugore shkaktojnë më shumë viktima në Shqipëri sesa vrasjet, apo edhe humbjet e jetëve nga sëmundjet kancerogjene.  *( abc news – 13:07- 27 tetor, 2019)

Në 65 ditë (2021) shenohen 88 viktima, nga aksidentet automobilistike rrugore !

Nuk po e lodh më shumë lexuesin tim të nderuar me shifra dhe fakte rreth vrasjeve në Shqipërinë e këtyre viteve anarshiste e revanshiste, herë me ngjyra e me përmbajtje fashiste e, herë me ato liberalet që i lejojnë ekstremit djathtist të djegë e të vrasë sa herë të doje e, ku të dojë.

Kushdo me arsye të kthjellët e të shëndoshë që ndalon gjykimin tek kjo dukuri turpëruese, “vrasja” do të ndjejë se si nëpër damarët e venat e tij, do t’i vlojë edhe gjaku, nga turpërimi që ia riinjektuan, pas një harrese mbi 40 – vjeçare të kësaj plage, në kohën e Socializmit.

Sot vriten shqiptarët me njëri – tjetrin, sepse kështu thotë (urdhëron) e dëshiron antishqiptarizmi që nga ai historiku e, deri tek ky aktuali; sepse, kështu e për këtë punojnë edhe mediat “shqiptare”, shpirtshitura tek djalli; sepse kështu, duke i nxjerrë shumicën e kriminelëve dhe të vrasësve si “njerëz me çrregullime mendore”, si njerëz “nën efektin e drogave dhe të alkoolit”, si njerëz “manjakë”, si njerëz “të vrazhdtë”, nuk bëjnë gjë tjetër veçse punojnë për vērtetimin e platformave antishqiptare, të vjetra e të reja, të Çubrilloviçve të vjetër e të rinj.

Ky rend ekonomiko – shoqëror kapitalist është rendi që i ka në gjenezën e vet vrasjet, por edhe të gjitha plagët më të ulëta morale, njerëzore e shoqërore, pa të cilat as që mund të ekzistojë. Po të mos e shoqëronin këtë rend, në çdo hap të vetin këto dukuri e plagë, si pasaporta të identitetit të tij, me siguri që do të quhej, ose socializëm, ose komunizëm.

Natyra çnjerëzore e kapitalizmit vret çdo minutë, çdo orë e çdo ditë e, s’ndjen të ngopur.
Natyrshëm del edhe përfundimi më se logjik e, si në dritën e diellit se: Shqiptarët sot në këto tri dekadat e fundit i ka vrarë vetem një vrasës, që është tepër real e, ndaj të cilit duhet të kërkojnë marrjen e hakut e larjen e gjakut. Ky vrasës i shqiptarëve është vetem rendi kapitalist, e, jo shqiptarët e trullosur nga “droga” e politikës përçarëse e sunduese e këtij vampiri e gjakpirësi jetëvrasës!
Mbështetja e këtij rendi çnjerëzor nga populli në shumicë, ngjan me një çmenduri, ku viktimat e dashurojnë viktimizuesin!

U ndala tek plaga e vrasjes, pasi kjo sot po merr  ngjyrat e një epidemie e, askush s’po mundet ta parandalojë, me masa diagnostifikuese, si në shëndetësinë e socializmit.

Mendoj se nuk e kemi kohën e, as luksin që ne shqiptarët, në këtë cak kohor historik, që të merremi me dukuri të kohërave të kalbura moralisht e politikisht, me ndarje e përçarje, shprehje e një mendësie atavizmë e kohërave të errëta të mendimit njerëzor, çka do të turpëroheshin edhe brezat tanë të njëmijë shekujve para nesh.

Sot shqiptaria e shëndoshë dhe qëndrestare, atdhetare e mendjendritur kërkon mirëkuptim e bashkëveprim, progresiste e gen shqiptar, që frymëzojnë, orientojnë e prijnë me veprime konkrete për kah ribashkimi i trojeve e i kombit tonë. Kur baballarët e këtyre “aleatëve” tanë evropianë na ndanë e na përçanë barbarisht e çnjerëzisht, nuk na pyetën fare ne, as si qenie njerëzore.

Përse u dashka që ne sot, t’i pyesim e t’iu lutemi këtyre bijve të atyre mendjeplakurve antishqiptarë, kur jemi në rrethana mijëra herë më të volitshme për ne si komb, që të realizojmë kryeëndrrën tonë të të gjithë brezave që luftuan e ranë për realizimin e saj?
Në se kjo politika e sotme përbetohet tek aleatja e saj më e madhe, SHBA, mos ta turpërojë aleaten e saj besnike, duke u sjellur si servile e saj, si e pazonja për të tentuar ta nxjerrë vetë qimen nga qulli në sahanin e vet, si një aleate që din dhe zotëron vetëm profesionin e grindjes me vetëveten, por edhe atë të vënies në shërbim të viktimizuesit shekullor.
Këtë nuk e dëshiron as Amerika, por asnjë aleat serioz i shqiptarëve. Ndaj kësisoj sjelljesh ndjen neveri çdo aleat i yni, kushdo qoftë ai.

Rrethanat historike vijnë rrallë nga dera e atij që ka nevojë për ndihmën e tyre, ndaj ato kanë ardhur me kohë, por s’mund të rrinë pa pushim të na presin para derës tonë, sa të biem në ujdi ne me njëri – tjetrin e, të heqim dorë nga mistrecet banale politike në raport me dy shtetet tona shqiptare në Ballkan.
Kjo është koha e shqiptarëve, që po flet shqip dhe po frymon shqip, ndaj ndalojeni vrasjen e saj!
Vetëm bashkimi kombëtar shqiptar është arma që vret me leje e, me ligj, të gjithë vrasësit e kriminelët, politikat e pushtetet kriminale ndër shtetet e sotme shqiptare.

About admin

x

Check Also

Sa të gënjyer ishim !

/ Intervist që ia vlen të lexohet e rilexohet/ Intervistë me ish ...