Home / Lajme / SHABAN PALLUZHA NUK KA LUFTUAR KUNDËR REGJIMIT, POR KUNDËR PUSHTUESIT JUGOSLLAV

SHABAN PALLUZHA NUK KA LUFTUAR KUNDËR REGJIMIT, POR KUNDËR PUSHTUESIT JUGOSLLAV

Beqir Elshani

(Përgjigje Kryeministrit të Kosovës, Isa Mustafa, i cili përmes një shkrimi në facebook përkujtoi Shaban Palluzhën si luftëtar heroik kundër regjimit komunist jugosllav)

Zotëri Isa Mustafa, tribuni shqiptar – komandant Shaban Palluzha, nuk ka luftuar kundër sistemit komunist, qoftë edhe sistemit borgjez të Jugosllavisë, në krye me renegatin Josip Broz Tito, por ka luftuar kundër hordhive fashiste pushtuese të Jugosllavisë për mbrojtjen kombëtare të Kosovës, siç kanë luftuar të parët tanë kundër gjithë pushtuesve, dhe atij të fundit që konkretisht ishte më dinak dhe më fashist se dy të parët, dhe kjo ishte Jugosllavia Socialiste në krye me J. B. Titon. Prandaj nuk ka rëndësi nëse Armata Jugosllave ishte komuniste apo kapitaliste, me rëndësi është që ky vend ballkanik ishte pushtues fashist, ashtu siç ka qenë Gjermania e Hitlerit dhe Italia Musolinit. Ngjashëm deklaroi edhe ish-kryeministri i Kosovës, Hashim Thaçi, i cili me rastin njëvjetorit të Pavarësisë së Kosovës, tha se bacë Shabani është njeri i refuzimit dhe kundërshtimit të regjimit komunist, dhe se ishte luftëtar i demokracisë që luftoi kundër diktaturës komuniste. Megjithëse komandanti i brigadës shqiptare nuk ka luftuar për demokratizimin e Jugosllavisë, por për bashkimin e Kosovës me shtetin amë – Shqipërinë. Asnjë udhëheqës shqiptar nuk e kishte forcën diplomatike për ndryshimin e sistemit politik të Jugosllavisë, përveç çlirimit dhe bashkimit të tokave shqiptare nën sundimin e Jugosllavisë Fashiste. Prandaj deklarata e Thaçit “Kryengritja e Shaban Palluzhës është kundërvënia e parë e armatosur ndaj diktaturës komuniste” duhet të jetë kundër pushtuesit jugosllav (pa marrë parasysh sistemin e saj shtetëror). Të thuhet që Shaban Palluzha ka luftuar kundër regjimit komunist jugosllav gjatë Luftës së Dytë Botërore, do të thotë sikur Heroi Kombëtar Shqiptar, Shaban Palluzha, ka përkrahur sistemin borgjez të Drazha Mihaloviqit, kur dihet që si njëri ashtu edhe tjetri kanë punuar sipas Elaboratit fashist të Vasa Cubrilloviqit dhe Ivo Andriqit për shfarosjen e popullit shqiptar; siç thotë populli të jesh në mes murtajës dhe kolerës.

Tekembramja, mllefin e tyre kundër regjimit komunist jugosllav mund ta bëjnë demokratët e sotëm të Serbisë, Kroacisë e të Sllovenisë, republikat të cilat kishin privilegje të mëdha në ish-Jugosllavi, jo shqiptarët e robëruar e të vrarë në të gjitha sistemet shtetërore të Jugosllavisë. Në ish-Jugosllavi ka pasur me qindra kundërshtarë serbë që ishin kundër regjimit komunist, mirëpo ata nuk ishin për shpërbërjen e shtetit të tyre, gjithashtu nuk hiqnin dorë nga pushtimi i Kosovës. Duket qartë që ushtria shqiptare në krye me kreshnikun Shaban Palluzha nuk pranoi që me gjakun e tyre të vaditen shkurret jugosllave, por ulliri i atdheut të shenjtë shqiptar. Prandaj dallimi në mes serbit, kroatit dhe shqiptarit të burgosur ishte se i pari kërkonte kthimin e monarkisë që kishte para Luftës së Dytë Botërore, i dyti kërkonte shkëputjen dhe pavarësinë e Kroacisë prej njësisë federale të Jugosllavisë, i treti kërkonte çlirimin dhe bashkimin e Kosovës me shtetin amë – Shqipërinë. Dhe njëri ndër ta ishte kryengritës Adem Demaçi, i cili nuk luftoi kundër regjimit komunist, por kundër pushtuesit jugosllav me kërkesën e qartë, që nëse duam të mos derdhet gjaku dhe të ruhet paqja, Kosova duhet urgjentisht të shkëputet nga pushtimi jugosllav dhe të bashkohet me nënën e vet – Shqipërinë! E kundërta e burgosjes së Adem Demaçit për çlirimin e Kosovës nga pushtuesi jugosllav ishte Azem Vllasi, i cili në kohën e kryetarit të Republikës së Serbisë, Sllobodan Millosheviq, është burgosur për vazhdimin e regjimit titist. Prandaj të gjithë popujt në vendet e pushtuara, siç janë shqiptarët në tri republika sllave, irlandezët, baskët, kurdët, palestinezët dhe çeçenet nuk luftojnë për ndërrimin e sistemit shtetëror të kolonizatorit, por për pavarësi dhe bashkimin e tyre kombëtar sipas të drejtës ndërkombëtare për vetëvendosje.

Me rastin e përkujtimit të viktimave të rënë, në vend se politikanët e Kosovës të thonë “Viktimat e rënë nga fashizmi jugosllav”, thonë “Viktimat e rënë nga pushteti sllavo-komunist”, me anën e së cilës i bëjnë nder ish-pushtetit jugosllav. Të thuhet pushteti sllavo-komunist, do të thotë sikur Jugosllavia borgjeze ka qenë e mirë për shqiptarët, kur dihet që Serbia, pa marrë parasysh sistemin shtetëror mbetet armik i popullit shqiptar. Ngjashëm shkruhet edhe për pilotin e parë në LDB, Raif Rafo Gorani nga Ulqini, të cilin e vranë komunistët serbomalazezë. Prandaj duhet të shkruhet që u pushkatua nga serbomalazezët shovinistë, pa dallime të sistemit politik. Mos do të thotë se po të ishte Mali Zi shtet kapitalist, do të ishte më demokrat.
Jo vetëm që këto republika jugosllave kishin privilegje shtetërore, por kishin edhe universitete dhe fabrika të mëdha, si dhe transportin hekurudhor dhe ajror me tradita borgjeze në Zagreb, në Beograd, në Novi Sad dhe në Lubjanë, veprimtarinë e të cilave e vazhdoi dhe e përforcoi socializmi jugosllav prej Titos deri te pasardhësi i tij – S. Millosheviqi. Prandaj komandanti ynë, Shaban Palluzha, ka luftuar kundër pushtuesit jugosllav, ashtu siç kanë luftuar të parët tanë: Isa Boletini, Idriz Seferi, Bajram Curri, Hasan Prishtina, Azem Bejta, Shote Galica, kundër pushtuesit turk, austro-hungarez, italian dhe gjerman, pa marrë parasysh sistemet dhe reformat e tyre shtetërore të pushtuesit borgjez, fashist, kundërpopullor, reaksionar e despotik. Prandaj, atë që bëri me pushkë i madhi Palluzha në Luftën e Dytë Botërore për mbrojtjen e Kosovës nga ushtria jugosllave, duhej ta bënte Isa Mustafa me penë në Bruksel, për të mos e nënshkruar Asocicionin e Komunave Serbe (zajednicën serbe) në dëm të Kosovës së Pavarur dhe Sovrane.

Pikërisht z. Mustafa nuk akuzohet pse ka qenë komunist, por sepse me bashkëpunëtorët e tij ka qenë në shërbim të pushtuesit jugosllav në ditët më të vështira të Rinisë Shqiptare që kërkonte të drejta të barabarta në Jugosllavi, që për fat të keq ende vazhdon t’i shërbejë diplomacisë serbe në dëm të Kosovës. Sipas vlerësimit të tij “kundër regjimit komunist jugosllav” do të thotë që Serbia e sotme kapitaliste ka të drejtë të ushtrojë diplomacinë ndaj Qeverisë së Kosovës, duke u deklaruar se tashmë komunizmi jugosllav ka vdekur, prandaj Kosova të rikthehet në koshin e Serbisë Kapitaliste. Më mirë do të ishte po shkruante “Shaban Palluzha, luftëtar heroik kundër pushtuesit të egër jugosllav (i bardhë apo i zi qoftë), siç thotë populli të dy ishin arusha karpatiane, edhe Titoja edhe Drazha. Mirëpo populli shqiptar e ka parasysh se këtë deklaratë titiste, po e jep një ish-kuadër i PKJ-së, si anëtar, por edhe si nostalgjik i flaktë për ruajtjen e substancës kimike të vëllazërim-bashkimit jugosllav. Prandaj tribunin tonë popullor e përgëzojmë me madhështi kombëtare shqiptare:
LAVDI E PËRJETSHME LUFTËTARIT, SHABAN PALLUZHA, KUNDËR PUSHTUESIT JUGOSLLAV PËR ÇLIRIMIN DHE BASHKIMIN E TROJEVE SHQIPTARE!
Suedi, 22.02.2016

About admin

Leave a Reply

x

Check Also

INTERVISTA/ Zef Brozi: SHBA shpalli ‘Non grata’ Berishën me informacione të tri dekadave! Tani Drejtësia shqiptare duhet t’ja konfiskojë pasuritë

Ish-Kreu i Gjykatës së Kasacionit në vitin 1994, flet nga SHBA: “Ja ...